ایک شخص مجھے مسلسل ہراساں کررہا ہے، پروفیشنل باکسر عالیہ سومرو کا انکشاف

 

کراچی کے علاقے لیاری سے تعلق رکھنے والی عالیہ سومرو ایک پروفیشنل ویمن باکسر ہیں۔ انہوں نے حال ہی میں ایک ویڈیو بیان میں بتایا کہ ایک شخص انہیں مسلسل ہراساں کر رہا ہے۔ عالیہ نے کہا کہ وہ اپنی محنت اور کامیابیوں کی وجہ سے کچھ تعصب پسند لوگوں کے نشانے پر ہیں، جو ان کی جیت کو قبول نہیں کر رہے۔

عالیہ سومرو کے مطابق کچھ لوگ پروفیشنل باکسنگ کو جعلی کھیل قرار دے کر جھوٹی خبریں پھیلا کر انہیں بدنام کرنے کی کوشش کر رہے ہیں۔ وہ کہتی ہیں کہ یہ لوگ خواتین کی کامیابیوں کو روکنا چاہتے ہیں اور چاہتے ہیں کہ عورتیں صرف گھر کے کاموں تک محدود رہیں، مگر وہ ایسا کبھی ہونے نہیں دیں گی۔

عالمی سطح پر پاکستان کا نام روشن کیا

عالیہ نے کہا کہ انہوں نے کبھی ورلڈ چیمپئن ہونے کا دعویٰ نہیں کیا، لیکن وہ عالمی سطح پر پاکستان کا پرچم بلند کر رہی ہیں۔ انہوں نے تھائی لینڈ میں رینکنگ فائٹ جیت کر پاکستان کا نام روشن کیا ہے، اور پورے ملک میں ان کی پذیرائی ہوئی ہے۔ سندھ حکومت نے بھی ان کی مدد کی ہے۔

سندھ کی بیٹی ہونے پر فخر

عالیہ نے کہا کہ وہ لیاری کی ایک مزدور گھرانے کی بیٹی ہیں اور ان کا ڈومیسائل سندھ میں ہے۔ وہ سوال کرتی ہیں کہ کیا سندھ کی بیٹی کو عالمی سطح پر پاکستان کی نمائندگی کرنے کا حق نہیں؟ انہوں نے کہا کہ وہ پاکستان کی پہلی ویمن پروفیشنل باکسر ہیں اور اپنے ملک کا نام بلند کرنے میں مصروف ہیں۔

عالیہ نے سندھ حکومت، خاص طور پر وزیراعلیٰ سندھ اور لیاری کے تمام منتخب نمائندوں کا شکریہ ادا کیا، جنہوں نے دبئی میں بھارتی باکسر کے خلاف ہونے والی فائٹ کے لیے ان کی مدد کی ہے۔

جان کو خطرہ، قانونی مدد کی اپیل

عالیہ نے انکشاف کیا کہ انہیں اور ان کے خاندان کو جان کا خطرہ محسوس ہو رہا ہے کیونکہ ایک شخص انہیں مسلسل ہراساں کر رہا ہے۔ اس لیے انہوں نے سندھ حکومت، آئی جی سندھ پولیس اور دیگر حکام سے درخواست کی ہے کہ انہیں فوری قانونی مدد دی جائے اور ہراسگی کرنے والے کے خلاف کارروائی کی جائے۔

عالیہ نے کہا کہ وہ پروفیشنل باکسر ہیں اور اپنے کھیل پر توجہ دینا چاہتی ہیں۔ انہوں نے کہا کہ وہ پروفیشنل باکسنگ کی اندرونی لڑائیوں اور فیڈریشن کے مسائل سے دور ہیں اور صرف اپنی محنت پر توجہ دے رہی ہیں۔

قوم سے اپیل

آخر میں عالیہ سومرو نے قوم سے درخواست کی کہ وہ چند تعصب پسند افراد کی باتوں پر دھیان نہ دے بلکہ ان کی حمایت کرے تاکہ وہ اپنے ملک کے لیے مزید کامیابیاں حاصل کر سکیں۔